Up Kurs bringen

Kinners nee, nun ssind wee nen half Joahr ohne richdije Regierunge west, un watt is passeert? Nich werklich Schlümmet för össek. Dä Ersatz-Mannschaft hätt datt Schipp chaut dur datt Welt-Lamenge durbrocht.

Oaber ne Mannschaft ohne werkliche Regierunge, Kinners, datt is kaan Kinnerspeel, eck waat wovon eck schriewe! Wenn eck moal mett dän Landfrowens up Foahrt choahe, un wenn`t nur draa Doage in Bremen ssind, denn mott eck Vuurkehrungen dreepen, doamee datt dä Loaden löppet.

Eck köpe in (för Gustav ne Mettwost, för dä Chross-Kindere Seutewarkes, un Futter för dä Katte). Eck kooke vur: Nen oardentlichen Pott mett Arftezoppen för Gustav, Gehacktesklümpe för dän Rest vonne Mannschaft un backe nen oardentlichen Barch Amerikoaners för alle. Denn schriew eck ne Liste, watt, wann un wääne moaket werden mott un denke in`n Bus noa Bremen: Eck heff an allet dacht.

Oaber Pustekauken, all an`n twaaten Oabend röppet Jan an: "Omame, stell deck vur, Opape seggt, eck ssall den Jescherrspeuler leddich moaken! Opape chlöwt, ha is nu Bestimmer! Wann büst doa denn wia in`n Huse?"

Datt ssind ssau Momente, doa waat eck, eck draff nich te lange utbliewen. Eck mott dä in Huse wia up Kurs bringen.

... un veelichte mott dä Chrossjunge doch woll moal lernen, datt dä Jescherrspeuler seck nich aleene utröömt un wohänn dä Tassen un Telders hänn hört. Ett chifft noch veele te dauen un dä bruket meck!

Nun is Friedrich Merz anne Rieje koamen, nun mott ha wiesen, datt ssiene Mannschaft spuurt un up Kurs kümmt. Chauet Jelingen!

Raup meck an, wenn do Hülpe brukest.

Diene Meta ut Chloake, Mai 2025
(Gudrun Stutz, Gladebeck)