Plattdüütsche Dönekens 2.0
APP mott oak moal jenauch ssien!
Minsche, ett mott oak moal jenauch ssien! Düsse veele Wischereije uppen Ackerschnacker chaht meck jede Weeke mehr uppen Chaast!
DigitoaleTieten sind annebroaken un furdert miene Jeduld. Eck kann doa boale nich mehr hinderher.
Eck harre been Inköpen bettlang ümmer von jeden Loadn ne Kundenkoarte oder vonne Wostheke oder vonne Fautputzerin oder vonnen Buskutscher ne 10-er-Koarte.
Dä 10er Koarten, dä wören an besten. Wenn man 10 vull harre, dänn kreejchte man bee de Wosttheke enne Bockwost för ümmesüst, dä Fautputzerin harre ne chaue Creme för dä Feute un dä Buskutscher hätt aanen denn oak moal ümmesüst meenoahmen. Un nu? Allet Schnaa vun chistern.
Hüte willt se nur noch weeten off up dien‘ Ackerschnacker oak dä neejeste App uppespeelt is. Wenn nich, dänn biste nur noch nen Piesepeter un werst utsorteert. Dä Boahn chifft deck nur noch diene Boahnkoart uppet Händi. Wenn do datt nich wutt, dänn moste för diene Foahrkoarte mehr betoahlen. Wenn do been Dokter nich digitoal büst, denn most do boale dorfur betoahlen, datt se deck datt Rezepte utedrucket.
Been Netto chifft ett dä Anjeboe oak nur noch wenn do anne Kasse dä neejeste Netto-App hest un oak digitoal betoahlen daast.
Leste Weeke wolle eck use Enkeldochter moal nen poar Euros tausteeken weil ött been Kartuffelnutemoaken ssau chaut hulpen hätt. Un watt seggt ött? „Ommamme, watt ssall eck denn met Boarcheld? Kannste meck datt nich met Paypal overwiesen?“
Un datt ssind nur miene lütten Malessen, dä richdich chroaten Katastrophen speelten seck bee össeck inne Noahboarschaft aff. Dä Noahboar hätt nen E-Auto, stund mett düsse niejelnoagelneejen E-Kutsche been Rewe un töfft up ssiene Frowe, dä Inneköpen was.
Vur luter Langewiele hätt ha upp sienen Wischtelefon saahn, datt datt E-Auto öhnes schriewen hätt, datt ett nen Update/Appdate (wie hätt datt denn nu ?) chifft, naja jemahnt is, datt ett för datt E-Auto bettere Instellunge chifft un et denn noch veele better löppet.
Chaut, hätt dä Noahboar seck denket, denn moal los un runderloaen. Jo, un denn is et passert: Handi-Akku leddich, un mett dän Runderload`n von den neejen Doatens nich ferdich! Schitt happens! Datt E-Auto is nich mehr annesprungen. Nun stunden dä bade vurn Rewe un mosten affeschleppet werd`n! Dä Affschlepper hätt seck freuet!
Minsche, watt is datt denn fur ne Welt in dän dä Minsche nur noah ssienen Apps achtet werd`t?
Teuwet man! Wenn dä Russe oder dä Chinese datt Internet affschaltet, dänn schloaget miene chroate Stunne, denn hewwe eck noch mien Spoarstrump undern Bedde un kann mien Warkes noch boar betoahlen!
Loatet jöck nich verAPPeln! Beste Chrüße schicket joe
Meta
Chloake, August 2025
(Gudrun Stutz, Gladebeck)