In dr Chluus bin iich dehäi döört,
wo miir Eusi Rääbe häi.
Lueg zo de Rääbe, lueg zum Wyy
und bi bim Feschte gäärn drbyy.
Was in Eusem Doorff eso duet goo
duen iich fascht alles mitbechoo.

Mach s Liecht ab! Hed mir äine gschriibe,
das isch mir grad no hange bliibe.
Es feel im Gmäinroot d Energyy,
drum miesi jetz daas Spaare syy.

Schyynts, iich ghöörs do oobe munggle,
sitze die nid nur im Schloss im Dunggle!
S wäi d Gmäinirööt z Nacht wytter penne
drum döörffe d Stroosselampe nümmi brenne.

Dangg deere glatte Glanzidee
chasch uff em Häimwääg nüt me gsee.
Wenns rumplet, dätscht und holperet
isch äin vom Gmäinroot gschtolperet!
Finschteri Nacht e Winter lang,
villnen Aescher wird’s drab bang.

Au wenns d Zyttig nid duet schryybe
au üüber d Fasnacht sells so blyybe:
Ab de halber äins isch dunggli Rue,
und die allerletschti Bäiz macht zue!
Döörffsch an dr Fasnacht nümm luut lache
oder suscht e Blödsinn mache!

Wott men Eus zNacht d Fasnacht nää
sells zLäid grad öbbis bsunders gää:
Am Fasnachtssunndig in dr Nacht
wird daas Joor zümftig Fasnacht gmacht.

Men isch in deere Nacht derbyy,
s dien alli zämme, Grooss und Chlyy,
mit Ladäärne, Faggle, Pfunzle, Lampe,
im Gmäiniroot uff d Zeeche drampe.

Ab goots am halber äins bim Schloss
Mäinsch chunnt no äini uff em Ross?
Vilicht, do druff dien alli hoffe,
syy noochäär au no d Bäizen offe.

Jetz ab go baschtle, d Finger uuse!
Chönned spööter wiider pfuuse!
S häi alli zämme no gnue z due
suscht weer jo an dr Fasnacht Rue!

So nämmed d Gleeser, schängged yy:
Am beschte schmöggt dr Chluuserwyy.
Iich lüpf my Chelch, stooss mit Euch aa:
Miir wäi e glatti Fasnacht haa!