Meini sehr verehrte Dame und Herre, liebi Mellikerinne und Melliker,
Im Name vom Gmeindrot dörf ich si, zum hütige Neujahrsapero, rächt herzlich willkomme heisse.
D’Fyrtige und de Jahreswächsel vom 23gi zum 24gi lieged hinder eus.
Ich hoffe, Sie händ d’Glegeheit gha chli innezhalte, sich de Hektik vom Alltag entzieh chöne und au Zyt für sich sälber chöne neh.

Wämmer ufs vergangene Johr zrugg lueged, chömemer ned drumume en Blick ufs Wältgschehe z’werfe.
Machtgedanke vo einzelne Persone bringed Chrieg und Missgunscht. Dodrunder muess d’Bevölkerig starch liede. Mer chönd Eus das gar ned Vorstelle und für mich esch es unverständlich, dass mer i de hütige Zyt ned i de Lag esch, so e schlimmi Missgunscht z’beände.
Mer sind solidarisch met allne Opfer, hälfed und understützed finanziell….. so lang mer i de Lag sind das au zäme chönd stämme. Be allem Leid dörfemer aber ned vergässe, dass mer be Eus i de Schwitz au Lüt händ, wo uf eusi Solidarität und Hilf, au vom Staat, ahgwise sind. Irgendwänn wird das Fueder au überlade und dänn hoff ich üf Lösige wo es zämeläbe no wieter möglich macht.
Weniger ICH, meh WIR wär do wohl de richtig Gedankeahstoss.
S’ 2023 esch prägt gsy vo vielne Useforderige , wo mer eus als Gmeind hönd müesse stelle. Dank Euem Mitbestimme und Mitmache hämmer au die Useforderige guet meischtere chöne.
Herzliche Dank ah mini Kolleginne und Kollege vom Gmeindrot, ah d’Marion Marty, eusere Gmeindsschrieberinn, an Toni Meier wo eus met Rat und Tat in Sache Steibruch zur Site stoht, allne Kommissione i de Gmeind, de Stiftig Pro Mellike, allne Mitarbeiterinne und Mitarbeiter und alli wo sich für Mellike ihgsetzt händ. Ich freu mich, met Eu allne, au i dem Johr weder dörfe zäme z’schaffe.

Mer blicked jetzt zeversichtlich und optimistisch is neue Johr. De Gmeindrot will die positive Entwicklige vom vergangene Johr fortsetzte und witeri Massnahme ergriffe für es gmeinsams aktivs Dorfläbe. Mer wänd Eus witerhin für d’Bedürfniss vo de Mellikerinne und Melliker ihsetze
Mer wänd e offeni und transparänti Komunikation betriebe und für Ahliege und Ahregige vo Eu als Gmeindsmitglieder stehts es offnigs Ohr ha.
Es stönd spannendi, useforderndi Projekt und Verahstalltige bevor, womer au uf Eui Understützig und Mitarbet zähled. Gmeinsam chömer eusi Gmeind wieterentwickle und so es positivs Umfäld für Eus alli schaffe.
Am Donnschtig, de 18. Januar hätti de Steinbruch Mellike welle übers Baugsuech zue de Inerdstoffdeponie informiere. Da d’Baugsuchesunderlage nonig vorlieged wird de Termin verschobe. De Gmeindrot git es neus Datum bekannt, sobald alli Baugsuechsunderlage vollständig vorlieged.
D’Revision vo de Bau und Nutzigsordnig hät em vergangnige Johr gstartet.
S’Vorgehe und de zytlich Ablauf vo dere Planig harzt aber. De Gmeindrot esch met em Fortschritt vo dere Planig ned z’friede. Drum wird ahfangs Januar s’Gspröch met em Planer gsuecht. Er söll en Rächeschaftsbricht vorlege, über die Arbet wo bisher gleischtet worde esch und anhand vo dem Bricht wird übers witere Vorgehe entschiede. Wämer Eus do ned findet, esch es für de Gmeindrot dänkbar sich vom jetztige Planer z’tränne.
Im witere plant de Gmeindrot en Bevölkerigsworkshop zum Thema Zuekunft Mellikon 2030.
Underanderem söll au d’Personalplanig i de Behörde diskutiert werde.
Au en mögliche Fond für Mellike, gspisse us de Entschädigungszahlig vom Betrieb vo de Innerdstoffdeponie söll debie disskutiert werde.
De Gmeindrot wird alli Termin und Informatione witerhin au im Flugblatt Us em Gmeindrot bekannt geh.
Das wäri en churze Uhsblick gsy über die bevorstehende Projekt i dem Johr wo nöd abschlüssend esch.

Liebe Mellikerinne und Melliker, s’Johr 2024 bringt sicherlich neui Useforderige.
Ich bin zueversichtlich, dass mer die gmeinsam meischtere werdet. Gmeinsam chömer eusi Gmeind wieterentwickle und si zume Ort mache, i dem mer eus alli wohl und geborge fühled.
Mer hoffed uf eui understützig und uf es Johr met vilne positivi Ihdrück und Ereigniss.
Im Name vom Gmeindrot und au vo mer persönlich, wünsch ich Eu viel Glück, Erfolg, Freud, Zfriedeheit und dass sie gsund bliebed.
I dem Sinn……. Proscht und allne es guets Neuis!

Rolf Laube, Gemeindeammann Mellikon, 01.01.2024
Foto: Josef Fahad