Ändlig wider Morgeschtraich

Vor de Dreien us der Klappe.
Gschwind e Kaffi, will's di friert,
Und e Cognac fir der Bappe!
Heggschti Zyt, 's wird abmarschiert.
Ibernächtig bisch und blaich
Ändlig wider Morgestraich!

Stohsch im Gäßli, äne dure
Gsehsch dur d'Nacht d'Ladärne ko.
Naimen iebt e Waggis d'Schnuure.
Alles streggt der Hals derno,
Ob er au die Rächte braich.
Ändlig wider Morgestraich!

Und de heersch si pfyffe, drummle,
Daß's di bis in d'Zeeche frait.
Jetz muesch druggen und di dummle,
Sunscht verfählsch die Heerligkait.
Griegsch au Biff und Tritt und Spaich,
Ändlig wider Morgestraich!

's bruucht e frestlig Morgeliftli,
Bis i ändlig haimzue stampf.
Us de Baize strycht e Diftli,
Larvelagg und Suppedampf'
s Härz isch gligglig, d'Knei sin waich,
Ändlig wider Morgestraich!

Blasius im Nebelspalter 89/1963

Mir wünschen e schööni Basler Fasnacht