Meini sehr verehrte Dame und Herre,
liebi Mellikerinne und Melliker
Im Name vom Gmeindrot dörf ich si, zum hütige Neujahrsapero, rächt herzlich willkomme heisse.
D’Fyrtige und de Jahreswächsel vom 24gi zum 25gi lieged hinder eus.
Ich hoffe, Sie händ d’Glegeheit gha chli innezhalte, sich de Hektik vom Alltag entzieh chöne, Zyt met de Familie und au Zyt für sich sälber chöne neh.
Wämmer ufs vergangene Johr zrugg lueged, chömemer ned drumume en Blick ufs Wältgschehe z’werfe.
Machtgedanke vo einzelne Persone bringed Chrieg und Missgunscht. Dodrunder muess d’Bevölkerig starch liede. Mer chönd Eus das gar ned Vorstelle und für mich esch es unverständlich, dass mer i de hütige Zyt ned i de Lag esch, so e schlimmi Missgunscht z’beände.

Mer dörfed ame Ort läbe, wo s’Mitbestimme und d’Eigeverantwortig eis vo de höchschte Guet esch. Zue dem müemer sorg träge.
S’2024 esch für eusi chli aber feini Gmeind es Jahr voller Useforderige und schöne Momänt gsy. Be allne Projekt und Ufgabe sind die finanzielle Mittel vo eusere Gmeind emmer usefordernd. Und doch gits Ufgabe, wo’s die Mittel brucht und es useschiebe uf irgendeinisch kei Sinn macht.
Dank Euem Mitbestimme und Mitmache hämmer au die Useforderige guet meischtere chöne.
De Gmeindrot esch sich dere Lag bewusst und versuecht au met de knappe vorhandene finanzielle Ressource hushälterisch um zgoh.
Mer händ gmeinsam einiges erreicht und eus au als Gmeinschaft debie chöne wieterentwickle.

Herzliche Dank ah mini Kolleginne und Kollege vom Gmeindrot, ah d’Nadine Wenger eusere Gmeindsschrieberinn, de ganze Verwaltig, allne Kommissione i de Gmeind, de Stiftig Pro Mellike, allne Mitarbeiterinne und Mitarbeiter und alli wo sich für Mellike ihgsetzt händ. Ich freu mich, met Eu allne, au i dem Johr weder dörfe zäme z’schaffe. Ei Personelli änderig wird’s geh. Uf ändi Februar hät eusi Leiterin Finanze d’Eliane Keller be de Gmeind Zurzach kündet.
De Gmeindrot beduret ihre Entscheid nach dere lange Zämearbet met Ihre, verstoh aber au, dass si sich brueflich neu orientiere möchte.

Drum blickemer zeversichtlich und optimistisch is neue Johr. De Gmeindrot will die positive Entwicklige vom vergangene Johr fortsetzte und witeri Massnahme ergriffe für es gmeinsams aktivs Dorfläbe. Mer wänd Eus witerhin met breitem Wüsse und Gwüsse für d’Bedürfniss vo de Mellikerinne und Melliker ihsetze.
Mer wänd e offeni und transparänti Komunikation betriebe und für Ahliege und Ahregige vo Eu als Gmeindsmitglieder stehts es offnigs Ohr ha.
Es stönd spannendi, useforderndi Projekt und Verahstalltige bevor, womer au uf Eui Understützig und Mitarbet zähled. Gmeinsam chömer eusi Gmeind wieterentwickle und so es positivs Umfäld für Eus alli schaffe.
De Gmeindrot setzt au uf e konstruktivi Zämearbet met Partner wo uf de glyche Augehöchi sind und sich gegesitig respektiered. So nämemer d’Revision vo de Bau und Nutzigsplanig gmeinsam met de Gmeind Zurzach in Ahgriff, met em Wüsse, dass Zurzach und Mellike je eigeständig sind. Mer schaffed met em glyche Planigsbüro und au d’Planigskommission wird inere erschte Phase gmeinsami Sitzig ha. Will mer scho i de Vergangeheit uf Zämearbet gsetzt gha hät und jetzt das Projekt au gmeinsam ahgot, hät de Gmeindrot, nacheme Gspröch met em Kanton vor Wiehnachte, jetzt au Zuesicherig übercho, dass de Kanton 50% vo de Chöschte für die Revisionsplanig übernimmt.
E witieri Ufgab esch es i dem Johr de Vertrag über d’Verwaltigszämearbet met de Gmeind Zurzach muess neu verhandelt werde. De jetzig Vertrag lauft nachere Laufzyt vo 4 Johr ändi vo dem Johr us.
Au dodezue bruchts Verhandligspartner wo sich uf Augehöchi beweged und basierend uf Fakte und Grundlage zäme en Vertrag usarbeitet, wo für beidi Gmeinde akzeptabel esch. De neu usghandelt Vertrag wird eu dänn anere kommende Gmeindsversammlig zur Abstimmig vorgleit.
Im witere findet im Momänt no d’Vernehmlassig vom Ahörigsbricht zum neue Finanzusglych statt. Debie söttis, als Vorschlag vom Regierigsrot, e Umverteilig vom rümlich – strukturierte Laschteusglych geh.
Dodevo würd eusi Gmeind sehr profitiere und mer chiemtet statt wie bisher 0 Franke neu öppe 160000.- us dem Laschteusglych über.
Falls sich do e Mehrheit findelot wür die Umverteilig ab 2027 zum träge cho.
S’2025 esch au es Wahljohr für de Gmeindrot. Es wird änderige geh ih de jetztige Zämesetig. Mer werdet das im Verlauf vom Johr kommuniziere.

Das wäri en churze Uhsblick gsy über die bevorstehende Projekt i dem Johr wo nöd abschlüssend esch.

Gschätzti Dame und Herre, s’Johr 2025 bringt sicherlich neui Useforderige.
Ich bin zueversichtlich, dass mer die gmeinsam meischtere werdet. Gmeinsam chömer eusi Gmeind wieterentwickle und si zume Ort mache, i dem mer eus alli wohl und geborge fühled.
Mer hoffed uf eui understützig und uf es Johr met vilne positivi Ihdrück und Ereigniss.
Im Name vom Gmeindrot und au vo mer persönlich, wünsch ich Eu viel Glück, Erfolg, Freud, Zfriedeheit und dass er alli gsund bliebed.
I dem Sinn……. Proscht und allne es guets Neuis!

Rolf Laube, Gemeindeammann Mellikon (01.01.2025)