Post

Meini sehr verehrte Dame und Herre,
liebi Mellikerinne und Melliker

Im Name vom Gmeindrot dörf ich si, zum hütige Neujahrsapero, rächt herzlich willkomme heisse.
D’Fyrtige und de Jahreswächsel vom 25gi zum 26gi lieged hinder eus.
Ich hoffe, Sie händ d’Glegeheit gha chli innezhalte, sich de Hektik vom Alltag entzieh chöne, Zyt met de Familie und au Zyt für sich sälber chöne neh.
Leider händ eus hüt morge trurigi Nachrichte us Crans Montana erreicht.
Mer dänked ah dere stell ah allni Betroffeni und ihrne Ahghörige und wünsched vo do us viel Chraft und Zueversicht.

Händ sie sich au scho Gedanke zum neue Johr gmacht?
vilicht met eme guete Vorsatz, was mer anderscht mache chönti, was mer besser mache will oder regelmässiger?
De Jahreswächsel bütet sich ja ah, sich Gedanke übers vergangnige und das wo no vor eus lieht z’mache.
Persönlich freu ich mich uf mini neu Ufgab als Präsident vo Zurzibiet Regio, ha aber genauso respäkt devor.
Das söll aber mini Tätigkeit als Amme vo Mellike ned in Hindergrund stelle sondern höchstens ergänze.

Wämmer ufs vergangene Johr zrugg lueged chani säge, dass ich es überuhs wertvoll finde, dass mer ame ame Ort dörfed läbe, wo s’Mitbestimme und d’Eigeverantwortig eis vo de höchschte Guet esch. Zue dem müemer sorg träge.

S’2025 esch für eusi Gmeind es Jahr voller Useforderige und schöne Momänt gsy. Be allne Projekt und Ufgabe sind die finanzielle Mittel emmer usefordernd. Und doch gits Ufgabe, wo’s die Mittel brucht und es useschiebe uf irgendeinisch kei Sinn macht.
Dank Euem Mitbestimme und Mitmache hämmer au die Useforderige guet meischtere chöne
De Gmeindrot esch sich dere Lag bewusst und versuecht au met de knappe vorhandene finanzielle Ressource hushälterisch um zgoh.
Mer händ gmeinsam einiges Erreicht und eus au als Gmeinschaft debie chöne wieterentwickle.
Herzliche Dank ah mini Kolleginne und Kollege vom Gmeindrot, eusere Gmeindsschrieberinn, de ganze Verwaltig, allne Kommissione i de Gmeind, de Stiftig Pro Mellike, allne Mitarbeiterinne und Mitarbeiter und alli wo sich für Mellike ihgsetzt händ. Ich freu mich, met Eu allne, au i dem Johr weder dörfe zäme z’schaffe.
En bsondere Dank gilt minere Kollegin Christine Elmer. Mit Ihre hani dörfe 7 Johr im Gmeindrot zäme schaffe.
Christine ich danke dir ganz herzlich für din Ihsatz für eusi Gmeind uf für dini Kollegialität womer zäme hand dörfe läbe.
Ich heisse Denise Spuhler herzlich willkomme im Gmeindrot. Sie tritt d’Nachfolg vo de Christine ah. Diesbezüglich hät de Gmeindrot au scho d’Ressortverteilig no vor de Wiehnacht vorgnoh. Mer werdet eu mitti Januar no derüber informiere.
Ich danke de Monika und em Urs Baumgartner vo ganzem Herz für d’ Pflege vo eusne Mehrzweck-Räumlichkeiten. Mit viel Engagement, Sorgfalt und eme wache Blick fürs Detail händ sie über langi Zyt defür gsorgt, dass sich euses Mehrzweckgebäude stets im beschte Zuestand präsentier hät – suuber, ihladend und bereit für unzählige Anlässe, Sitzige und Begegnige
Mer alli säged DANKE für die geleisteti Arbeit, de zuverlässig Insatz und s’Herzbluet, wo sie in die Pflege vo eune Räumlichkeiten investiert händ.
Als neue Huswart esch de Fredy Schertenleib sitem Oktober 2025 ahgstellt.
De Gmeindrot freut sich sehr, mit Fredy e engagierti und zuverlässigi Person für diese wichtige Tätigkeit gfunde z’ha, und wünsched ihm viel Freud ah sinere neue Ufgab.
Als Dank und wertschätzig plant de Gmeindrot ändi Februar en Behördeahlass. Zue dem sind alli Mitglieder vo Behörde, Kommissione, Stiftig und Mitarbeiterinne und Mitarbeiter ihglade.
Mer blicked zeversichtlich und optimistisch is neue Johr. De Gmeindrot will die positive Entwicklige vom vergangene Johr fortsetzte und witeri Massnahme ergriffe für es gmeinsams aktivs Dorfläbe. Mer wänd Eus witerhin met breitem Wüsse und Gwüsse für d’Bedürfniss vo de Mellikerinne und Melliker ihsetze
Mer wänd e offeni und transparänti Komunikation betriebe und für Ahliege und Ahregige vo Eu als Gmeindsmitglieder stehts es offnigs Ohr ha.
Es stönd spannendi, useforderndi Projekt und Verahstalltige bevor, womer au uf Eui Understützig und Mitarbet zähled. Gmeinsam chömer eusi Gmeind wieterentwickle und so es positivs Umfäld für Eus alli schaffe.

Im Oktober 2025 hät de Gmeindrot d'Bevölkerung zumene öffentliche Spaziergang ihglade, um über d'Revision vo de Nutzigsplanig z'informiere.
Ah dere Verahstaltig händ die Teilnehmende d'Gelegenheit gha, sich vor Ort über d' wichtigschte Theme vo de laufende Arbeite z'informiere und sich mit Gemeindevertreter und Fachpersone usztusche.
Die öffentligi Mitwirkung startet im erste Halbjahr 2026. Zu däm Zeitpunkt werdet d'Entwürf vo de Bau- und Nutzigsordnung sowie de Bauzonen- und Kulturlandplan öffentlich ufgleit. Vorussichtlich wird’s dezue au no e Informationsverahstalltig geh.
Alli Interessierte sind ihglade, ihre Stellungsnahme iizbringe.
D'Unterlage zur Revision finded Sie uf unserer Website mellikon.ch unter em Bereich „Aktuelles“. Die Plattform haltet Sie stets uf em neuste Stand über de aktuelli Projektfortschritt und Ihri Möglichkeit zur Mitwirkig.

E witieri Ufgab esch es i dem Johr de Vertrag über d’Verwaltigszämearbet met de Gmeind Zurzach muess neu verhandelt werde. Dadezue macht de Gmeindrot au abklärige ih verschiedeni Richtige. S’Ziel esch e Verwaltigslösig wo finanziell tragbar esch und d’Bedürfniss vo de Bevölkerig und em Gmeindrot entspricht.

Das wäri en churze Uhsblick gsy über die bevorstehende Projekt i dem Johr wo nöd abschlüssend esch.

Gschätzti Dame und Herre, s’Johr 2026 bringt sicherlich neui Useforderige.
Ich bin zueversichtlich, dass mer die gmeinsam meischtere werdet. Gmeinsam chömer eusi Gmeind wieterentwickle und si zume Ort mache, i dem mer eus alli wohl und geborge fühled.
Mer hoffed uf eui understützig und uf es Johr met vilne positivi Ihdrück und Ereigniss und met schöne Begegnige.

Im Name vom Gmeindrot und au vo mer persönlich, wünsch ich Eu viel Glück, Erfolg, Freud, Zfriedeheit und dass er alli gsund bliebed.
I dem Sinn……. Proscht und allne es guets Neuis!

Rolf Laube, Gemeindeammann Mellikon (01.01.2026)