Wo d Lüt vo Aesch amme schööne Moorgen uus em Schloof verwacht syy, häi si iiren Auge nid mööge draue: Uff em Chemmi vo der „Chesseli“ nischted e Storch. Au wo si in den Auge griibe häi isch dr Storch bliibe, käi Fata Morgana. Wien e Lauffüür isch die Gschicht duurs Doorff. E Storch uff dr Chesseli! Ganz sicher, iich han en sälber gsee! Uff em Chemmi! Er stoot uff em Näscht! Daas heds no nie gää. … Numme wär ganz gnau aanegluegt hed, isch deere Sach uff d Spuur choo: Dä Storch läbt nit, dä isch jo gaar nit ächt. Was syy daas für Luusbuebe? Nachtbuebe häi de Lüt e Sträich gspiilt.

Aber, wie isch daas gange? So hooch uffs Chemmi uufe? Dr Schillä, dr doomoolig Gmäinverwalter und au no Füürweerkommanddant hed scho öppe gwüsst, woon är mues go sueche. Äine hed är bsunders im Aug gha. Dä hed är diräggt uffs Büro zitiert. ‘Daas goot denn öppe gaar nit’, hed är sälle apkanzlet. ‘D Füürweerläitere goot nid zum Magazin uus, ooni dass iich öppis drvoo wäiss’. As es ooni Läitere gangen isch, hed sich dr Kommanddant gaar nid chönne voorstelle. Drbyy isch sälli Nacht d Füürweerläitere käi Meeter zum Huus uus. Eusi Fründ häi nämmlig in deere Nacht dr Storch mit Gaasballöön an lange Fääde uffs Chemmi uufe zirgglet. E Kunschtstügg, wo si vorhäär im Ghäime giebt häi. E glungene Nachtbuebesträich wien er im Buech stoot. Ganz ooni öppis z Gkchabutt zmache.

An dr Fasnacht 1978 isch die Gschicht vo de Chruuselbeeri-Schnören uufgnoo worde. E Blaggeddekünschtler hed se spööter uff dr Blaggedde 1993 – ‘Aadie Chesseli’ vereewiget.

Weeli Blaggedden isch die schöönscht? In der Uusstellig im Heimatmuseum Aesch, ‘Syt 50 Joor laufts rund’ döörffsch abstimme.

D Uusstellig isch s neechscht Mool am Sunntig. 21. Jänner vom 13h bis 17h offe.

Stiftigsroot Heimatmuseum Aesch.

#heimatmuseumaesch #aeschbigott